حلووووووووووووووووووة

كان فيه واحد على نياته

جرّب يستثمر أمواله

وكان عنده ببغاء يتكلم

مشكلة الببغاء إنه كل ما شاف راعيه قال : ياغبي .. يا غبي .. يا غبي

راعيه ضاق صدره وقرر ياخذ الببغاء لمدرب الطيور علشان يعدّله

يا مدرب الطيور .. شوف لك صرفة مع هذا الببغاء

كل ما شافني فشلني عند الناس .. غبي غبي

أبيك تدربه زين وتعدّل كلامه

علشان يغيّر هالكلمات اللي يرددها كل ماشافني

قال المدرب : ما عليك .. خلّه عندي كم يوم

ولما راح راعيه جاب المدرب سطل مويه حارة

وحطه قدامه .. وسأل الببغاء .. أنا مين !!

قال الببغاء : أنت صديق الغبي

وينزله المدرب في المويه الحاره ثم يطلّعه .. ويسأله .. أنا مين ؟

قال : أنت صديق الغبي

وينزله في المويه مرة ثانية .. ثم يطلعه .. أنا مين ؟

وعلى هالحال .. حتى تربى الببغاء وتسنّع

أخيراً .. قال له المدرب .. أنا مين ؟

قال الببغاء : أنت صديق أذكى واحد في العالم

ويوم جا راعي الببغاء قال المدرب : تفضل اسأله

قال راعي الببغاء : أنا مين ؟

قال الببغاء : أنت مين ؟! .. وهذا سؤال !!

أنت الذكي إلا أنت أذكى واحد عرفته في حياتي

قال له راعيه : .. طيّب .. وإذا لعبت بفلوسي على كيفي ؟!

قال الببغاء : .. هذي فلوسك من عرق جبينك تسوي فيها اللي تبي

قال : طيّب إذا دخّلت فلوسي في مساهمة عقارية ؟

قال الببغاء : ممتاز حركة استثمارية في غاية الذكاء ومن أذكى واحد في العالم

طيّب .. وإذا دخلت فلوسي عند الجمعة ؟

طبيعي .. تنويع استثماري من أذكى واحد في العالم

طيّب .. وإذا دخلت فلوسي عند ابن حسن ؟

ذكاء خارق .. وماشي مع الحكمة اللي تقول لا تحط البيض في سلة واحدة

فعلا أذكى واحد في العالم

طيّب .. وإذا دخلت فلوسي عند العيد ؟

عادي .. وزيي ما يقولون حشر مع الناس عيد .. صحيح إنك أذكى واحد في العالم

طيّب .. وإذا دخلت فلوسي في سوق الأسهم السعودية ؟

قال الببغاء : يا عمي هات المويه

قايلّك هذا أغبى وأثور وأدبش واحد في العالم